ధ్యానమ్ –
శ్వేతాంబరోజ్జ్వలతనుం సితమాల్యగంధం
శ్వేతాశ్వయుక్తరథగం సురసేవితాంఘ్రిమ్ |
దోర్భ్యాం ధృతాభయగదం వరదం సుధాంశుం
శ్రీవత్సమౌక్తికధరం ప్రణమామి చంద్రమ్ || 1 ||
ఆగ్నేయభాగే సరథో దశాశ్వ-
-శ్చాత్రేయజో యామునదేశజశ్చ |
ప్రత్యఙ్ముఖస్థశ్చతురశ్రపీఠే
గదాధరో నోఽవతు రోహిణీశః || 2 ||
అథ స్తోత్రమ్ –
చంద్రం నమామి వరదం శంకరస్య విభూషణమ్ |
కళానిధిం కాంతిరూపం కేయూరమకుటోజ్జ్వలమ్ || 3 ||
వరదం వంద్యచరణం వాసుదేవస్య లోచనమ్ |
వసుధాహ్లాదనకరం విధుం తం ప్రణమామ్యహమ్ || 4 ||
శ్వేతమాల్యాంబరధరం శ్వేతగంధానులేపనమ్ |
శ్వేతచ్ఛత్రోల్లసన్మౌళిం శశినం ప్రణమామ్యహమ్ || 5 ||
సర్వం జగజ్జీవయసి సుధారసమయైః కరైః |
సోమ దేహి మమారోగ్యం సుధాపూరితమండలమ్ || 6 ||
రాజా త్వం బ్రాహ్మణానాం చ రమాయా అపి సోదరః |
రాజా నాథశ్చౌషధీనాం రక్ష మాం రజనీకర || 7 ||
శంకరస్య శిరోరత్నం శార్ఙ్గిణశ్చ విలోచనమ్ |
తారకాణామధీశస్త్వం తారయాఽస్మాన్మహాపదః || 8 ||
కల్యాణమూర్తే వరద కరుణారసవారిధే |
కలశోదధిసంజాతకలానాథ కృపాం కురు || 9 ||
క్షీరార్ణవసముద్భూత చింతామణిసహోద్భవ |
కామితార్థాన్ ప్రదేహి త్వం కల్పద్రుమసహోదర || 10 ||
శ్వేతాంబరః శ్వేతవిభూషణాఢ్యో
గదాధరః శ్వేతరుచిర్ద్విబాహుః |
చంద్రః సుధాత్మా వరదః కిరీటీ
శ్రేయాంసి మహ్యం ప్రదదాతు దేవః || 11 ||
ఇదం నిశాకరస్తోత్రం యః పఠేత్ ప్రత్యహం నరః |
ఉపద్రవాత్ స ముచ్యేత నాత్ర కార్యా విచారణా || 12 ||
ఇతి శ్రీ చంద్ర స్తోత్రమ్ |