శ్రీ బృహస్పతి స్తోత్రమ్

అస్య శ్రీబృహస్పతిస్తోత్రస్య గృత్సమద ఋషిః అనుష్టుప్ ఛందః బృహస్పతిర్దేవతా బృహస్పతిప్రీత్యర్థే జపే వినియోగః ||

గురుర్బృహస్పతిర్జీవః సురాచార్యో విదాంవరః |

వాగీశో ధిషణో దీర్ఘశ్మశ్రుః పీతాంబరో యువా || 1

సుధాదృష్టిర్గ్రహాధీశో గ్రహపీడాపహారకః |

దయాకరః సౌమ్యమూర్తిః సురార్చ్యః కుంకుమద్యుతిః || 2

లోకపూజ్యో లోకగురుర్నీతిజ్ఞో నీతికారకః |

తారాపతిశ్చాంగిరసో వేదవైద్యపితామహః || 3

భక్త్యా బృహస్పతిం స్మృత్వా నామాన్యేతాని యః పఠేత్ |

అరోగీ బలవాన్ శ్రీమాన్ పుత్రవాన్ స భవేన్నరః || 4

జీవేద్వర్షశతం మర్త్యో పాపం నశ్యతి నశ్యతి |

యః పూజయేద్గురుదినే పీతగంధాక్షతాంబరైః || 5

పుష్పదీపోపహారైశ్చ పూజయిత్వా బృహస్పతిమ్ |

బ్రాహ్మణాన్ భోజయిత్వా చ పీడాశాంతిర్భవేద్గురోః || 6

ఇతి శ్రీస్కందపురాణే శ్రీ బృహస్పతి స్తోత్రమ్ |